Olmaliqda 10-sinf qiz maktabda yig‘ilishidan so‘ng vafot etgani aytilmoqda
Holat bo‘yicha tekshiruv boshlandi.
Toshkent viloyati Olmaliq shahridagi maktablarda ichki ishlar xodimlari ishtirokida o‘tkazilgan “tarbiyaviy suhbat” jarayonida 2009-yilda tug‘ilgan maktabning yuqori sinf o‘quvchisi K.E. vafot etdi. Bu haqda “Nemolchi.uz” xabar qildi.
Qayd etilishicha, voqea Olmaliqdagi maktablardan birida ichki ishlar organlari xodimlari yuqori sinf o‘quvchi qizlariga «tarbiyaviy» yig‘ilish o‘tkazgani vaqtida sodir bo‘lgan. Xodimlar qizlarga turli mish-mish va g‘iybatlarni tarqatishga yo‘l qo‘ymaslik haqida baland ovozda tushuntirish bergan.
“Yig‘ilish vaqtida bunday munosabatdan cho‘chib, olingan stress natijasida qizlardan birining qonida tromb uzilib ketgan va u vafot etgan”, — deyiladi “Nemolchi.uz” xabarida.
Mazkur holatga Toshkent viloyati Maktabgacha va maktab ta’limi boshqarmasi munosabat bildirdi.
Boshqarmaga ko‘ra, voqea joriy yilning 28-yanvar kuni Olmaliq shahridagi 5-sonli umumta’lim maktabida sodir bo‘lgan.
Munosabatga ko‘ra, 10-sinf o‘quvchisi K.E. maktab yo‘lagida hushini yo‘qotgan.
“Ko‘rsatilgan tibbiy muolajalarga qaramasdan, qiz vafot etgan. Mazkur holat yuzasidan tergovga qadar tekshiruv harakatlari olib borilmoqda”, — deyiladi rasmiy munosabatda.
