Rossiyada migrantlar uchun daromad nazorati va soliqni oldindan to‘lash joriy etiladi

 

Rossiyada mehnat migrantlariga oid yangi tartiblarni joriy etish rejalashtirilmoqda. Hukumatning qonunchilik faoliyati bo‘yicha komissiyasi “Rossiya Federatsiyasida xorijiy fuqarolarning huquqiy maqomi to‘g‘risida”gi qonun hamda Soliq kodeksiga kiritilayotgan o‘zgartirishlarni maʼqulladi. Bu haqda TASS nashri xabar berdi.

 

Mazkur o‘zgartirishlar migrantlar daromadlari ustidan nazoratni kuchaytirish, qo‘shimcha soliq majburiyatlarini joriy etish hamda qoidabuzarlik holatlarida mamlakatda qolish muddatini qisqartirishni nazarda tutadi.

 

Hujjatga ko‘ra, Rossiyada vaqtincha yashovchi xorijiy fuqarolar Ichki ishlar vazirligiga o‘zlarining qonuniy daromadlari haqida hujjatlar taqdim etishi shart. Bunga daromad to‘g‘risidagi maʼlumotnomalar, soliq deklaratsiyalari nusxalari yoki soliq to‘langanini tasdiqlovchi hujjatlar kiradi. Agar daromad tasdiqlanmasa, migrantning vaqtincha yashash muddati qisqartirilishi mumkin. Ushbu talab migrantlarning oila aʼzolariga ham taʼsir qilishi ehtimoli bor.

 

Shuningdek, minimal daromad darajasi alohida belgilanadi. Agar migrantning daromadi hududiy yashash minimumidan past bo‘lsa, ish ruxsatnomasini olish yoki uni uzaytirish imkoniyati bo‘lmaydi. Patentga birinchi marta murojaat qilayotgan shaxslar hamda jismoniy shaxslar uchun shaxsiy ehtiyojlar doirasida ishlovchilar uchun ayrim istisnolar saqlab qolinadi.

 

Bundan tashqari, shaxsiy daromad solig‘ini oldindan to‘lash talabi joriy etiladi. Jismoniy shaxslar tomonidan yollangan migrant ishchilar uchun to‘lov miqdori har bir voyaga yetmagan qaramog‘idagi bola uchun 50 foizga oshiriladi.

 

Rossiya Advokatlar assotsiatsiyasi maʼlumotiga ko‘ra, tashkilotlar va yakka tartibdagi tadbirkorlar uchun bazaviy to‘lov stavkasi oyiga 1200 rubl, jismoniy shaxslar tomonidan yollangan migrantlar uchun esa oyiga 1700 rublni tashkil etadi.