Andijonda bankdan qarzdor MCHJ binosi xatlandi
MIB xabariga ko‘ra, tashkilot 2,4 mlrd miqdoridagi kredit qarzini to‘lamay kelgan.
Tadbirkorlik faoliyatini rivojlantirish maqsadida tijorat banklaridan olingan kreditlar o‘z vaqtida to‘lanmagan hollarda, qarzdorlikni qoplash uchun garovga qo‘yilgan mulkka nisbatan majburiy choralar qo‘llaniladi.
Majburiy ijro byurosi Andijon viloyati boshqarmasi ish yurituvida bo‘lgan sud hujjatlariga muvofiq, qarzdor masʼuliyati cheklangan jamiyat hisobidan undiruvchi “Garant bank” AJ foydasiga jami 2,4 milliard so‘m miqdoridagi kredit qarzi undirilishi belgilangan.
Sud hujjatlariga asosan undiruvni garovdagi javobgarga tegishli bo‘lgan ishlab chiqarish binolari va issiqxona inshootlariga qaratish belgilangan.
Byuroning viloyat boshqarmasi xodimlari tomonidan ijro harakatlari amalga oshirilib, qarzdorlarga belgilangan tartibda ogohlantirishlar berildi. Ijro jarayoni davomida boshlang‘ich bahosi 3,7 milliard so‘m bo‘lgan ishlab chiqarish binolari va issiqxona inshooti xatlandi.
Hozirda xatlangan mol-mulklarni elektron onlayn-auksion savdosiga chiqarish choralari ko‘rilmoqda.
