Kanadadagi maktabda yuz bergan otishma oqibatida 10 kishi halok bo‘ldi
Yana 25 nafar jarohatlangan shaxs mahalliy tibbiyot markazida tekshiruvdan o‘tkazilgan.
Kanadaning Britaniya Kolumbiyasi provinsiyasida joylashgan Tumbler Ridge o‘rta maktabida sodir bo‘lgan otishma oqibatida, dastlabki ma’lumotlarga ko‘ra, hujumchi bilan birga jami 10 kishi halok bo‘lgan. Bu haqda CBS xabar berdi.
Hodisa joyiga yetib kelgan huquqni muhofaza qiluvchi organlar olti nafar jabrlanuvchining jasadini aniqlagan. Yana bir jabrlanuvchi kasalxonaga olib ketilayotgan vaqtida vafot etgan. Keyinchalik voqeaga aloqador hududlardan yana ikki nafar halok bo‘lgan shaxs topilgan. Gumon qilinayotgan hujumchi o‘z joniga qasd qilgan bo‘lishi mumkin bo‘lgan jarohatlar bilan o‘lik holda aniqlangan.
Hodisa oqibatida og‘ir tan jarohati olgan ikki nafar jabrlanuvchi vertolyot orqali shifoxonaga yetkazilgan. Yana 25 nafar shaxs mahalliy tibbiyot markazida tekshiruvdan o‘tkazilgan.
Dastlabki ogohlantirishlarda gumondor jigarrang sochli ayol sifatida tasvirlangan. Keyinchalik politsiya boshqa gumondorlar yo‘qligiga ishonch bildirgan. Hozirda hodisa sabablari va barcha tafsilotlarni aniqlash bo‘yicha tergov harakatlari olib borilmoqda.
Ma’lumotlarga ko‘ra, mazkur maktabda 7–12-sinflarda taxminan 170 nafar o‘quvchi tahsil oladi. Xavfsizlik choralarini kuchaytirish maqsadida maktab hamda yaqin hududdagi ta’lim muassasalari vaqtincha yopilgan.
