Navoiyda sun’iy intellektga ixtisoslashgan sinflar ochilishi rejalashtirilmoqda
Yangi o‘quv yilidan “Bir maktab – bir IT sinf” tamoyili asosida maxsus ta’lim yo‘lga qo‘yilishi mumkin.
Prezident Shavkat Mirziyoyev 10-fevral kuni Navoiy viloyatini ijtimoiy-iqtisodiy rivojlantirish masalalariga bag‘ishlangan yig‘ilish o‘tkazdi. Unda hudud ta’lim sohasida respublikaning yetakchi viloyatlaridan biri ekani alohida ta’kidlandi. Xususan, oliy ta’lim qamrovi 71 foizga yetgani, o‘tgan yilda esa 10 ta maktab bitiruvchilari oliygohlarga kirish bo‘yicha 100 foizlik natija qayd etgani ma’lum qilindi.
Yig‘ilishda yangi o‘quv yilidan boshlab Navoiy va Zarafshon shaharlarida “Bir maktab – bir IT sinf” tamoyili asosida sun’iy intellekt va IT yo‘nalishlariga ixtisoslashgan sinflar ochish taklif qilindi. Ushbu tashabbus doirasida viloyatdan 100 nafar o‘qituvchi poytaxtda va xorijda IT hamda sun’iy intellekt yo‘nalishlari bo‘yicha malaka oshiradi.
Shuningdek, Toshkent axborot texnologiyalari universitetining Zarafshon filialida sun’iy intellekt va kiberxavfsizlik bo‘yicha kunduzgi ta’lim dasturini yo‘lga qo‘yish rejalashtirilmoqda.
Yig‘ilish yakunida prezident ushbu takliflarni ma’qullab, ularning amaliy ijrosi hudud aholisi hayotida aniq va ijobiy o‘zgarishlar keltirishi lozimligini ta’kidladi hamda mas’ullarga tegishli topshiriqlar berdi.
