Rossiyada o‘zbekistonlik erkak terrorchilik rejasida ayblanib, 20 yilga qamaldi
U terrorchilik harakati uchun nishonni aniqlash, kuzatuv o‘tkazish hamda portlovchi qurilma tayyorlash uchun joy tayyorlash bilan shug‘ullangan.
Rossiyaning Rostov-na-Donu shahridagi Janubiy okrug harbiy sudi O‘zbekiston fuqarosini Stavropol o‘lkasi hukumati binosiga nisbatan terrorchilik hujumini rejalashtirishda aybdor deb topdi. Sud hukmiga ko‘ra, u 20 yil muddatga ozodlikdan mahrum etildi.
Maʼlum qilinishicha, mahkum jazoning dastlabki besh yilini qamoqda, qolgan muddatini esa qattiq tartibli koloniyada o‘taydi. Shuningdek, unga 1 million rubl miqdorida jarima ham belgilangan.
Tergov materiallariga ko‘ra, 2023-yil yanvar oyida erkak Rossiya Federatsiyasida taqiqlangan “Islom davlati” terrorchilik tashkiloti manfaatlari yo‘lida harakat qilishga tayyorligini bildirgan videomurojaat yozib olgan.
Sud hujjatlariga ko‘ra, u tashkilot yetakchisining ko‘rsatmalari asosida Rossiya hududida terrorchilik hujumi amalga oshirilishi mumkin bo‘lgan aholi punktini tanlash, nishon bo‘yicha razvedka o‘tkazish hamda qo‘lbola portlovchi qurilma tayyorlash uchun zarur binolarni ijaraga olish majburiyatini olgan.
2023-yil 23-sentabr kuni u O‘zbekistondan Rossiyaga kelib, Stavropol shahrini tanlaganini maʼlum qilgan. Shundan so‘ng u bir nechta obyektlarning foto va video tasvirlarini tayyorlab, ularni tashkilot vakillariga yuborgan.
Keyinchalik unga ehtimoliy hujum manzili sifatida Stavropol o‘lkasi hukumat binosi ko‘rsatilgan. 2023-yil dekabr oyida u portlovchi moslama tayyorlash uchun zarur bo‘lgan butlovchi qismlarni xarid qilib, ularni yashirin joyda saqlagan.
2023-yil 18-dekabr kuni u Rossiya xavfsizlik xizmatlari tomonidan qo‘lga olingan. Sud jinoyatning og‘irligini hisobga olib, eng og‘ir jazolardan birini tayinlangan.
