Rossiyada qurilish maydonlaridagi migrantlarning ulushi 20 foizgacha kamaydi, ularning aksariyati o‘zbeklar

 

Rossiya qurilish sohasida xorijiy ishchi kuchi ulushi kamaygani kuzatilmoqda. Maʼlum qilinishicha, so‘nggi davrda qurilish maydonlarida chet ellik ishchilar ulushi taxminan 20 foizgacha qisqargan. Ushbu maʼlumot Sibir qurilish forumida Quruvchilar milliy assotsiatsiyasi (NOSTROY) prezidenti Anton Glushkov tomonidan taqdim etilgan.

 

Mutaxassisning taʼkidlashicha, ushbu tendensiya bir necha omillar bilan izohlanadi. Xususan, immigratsiya qonunchiligining qatʼiylashtirilishi hamda qurilish xizmatlariga bo‘lgan talabning pasayishi xorijiy ishchi kuchi sonining qisqarishiga olib kelgan. Natijada, Rossiya qurilish sektorida milliy ishchi kuchining ulushi oshib, hozirda asosiy ishchi kuchining katta qismini mahalliy fuqarolar tashkil etmoqda.

 

Shu bilan birga, Rossiyada qurilish sohasida faoliyat yuritayotgan xorijiy ishchilarning asosiy qismi anʼanaviy ravishda Markaziy Osiyo davlatlari, jumladan O‘zbekiston va Tojikistondan keladi.

 

“So‘nggi yillarda muvozanat O‘zbekiston foydasiga o‘zgardi. Bu mamlakatdan ko‘proq odamlar qurilish maydonlarida ishlamoqda, Tojikistondan kelgan ishchilar soni esa kamaydi”, deb taʼkidladi ekspert.

 

Shuningdek, Hindiston va Pokiston fuqarolarining ayrim sohalarda, jumladan qishloq xo‘jaligi va yengil sanoatda paydo bo‘layotgani qayd etilmoqda. Kelgusida ushbu ishchi kuchi qurilish sektoriga ham kirib kelishi mumkinligi aytilmoqda.

 

Mutaxassislar ilgari xorijiy ishchilar ulushi yuqoriroq bo‘lganini, ammo hozirgi vaqtda ayrim davrlarga nisbatan 15–20 foizga pasayish kuzatilganini qayd etmoqda.