Samarqanddagi uyda gaz balloni portlab, 5 kishi jarohatlandi
Jabrlanganlar orasida voyaga yetmagan bolalar bor. Ularning ahvoli og‘ir ekani aytilmoqda.
Samarqand viloyatining Ishtixon tumanidagi xonadonlardan birida gaz balloni portlashi yuz berdi. Bu haqida Zamon.uz muxbiri xabar bermoqda.
Qayd etilishicha, hodisa 10 fevral kuni tumanning Dehqonobod mahallasida yuz bergan. Gaz balloni portlashi oqibatida bir oilaning besh nafar aʼzosi og‘ir tan jarohati olgan.
Ular — 64 yoshli keksa erkak, 34 yoshli kelin, 7 yoshli qiz, 4 yoshli bola hamda 1,5 yoshli chaqaloq bo‘lgan.
Ikki nafar voyaga yetmagan bola turli darajadagi kuyish jarohatlari bilan Respublika shoshilinch tibbiy yordam ilmiy markazining Samarqand filialiga olib kelingan. 12 fevral kuni yana bir voyaga yetmagan bola shu muassasaga yotqizilgan.
Ayni paytda bolalarning ahvoli og‘ir ekani aytilmoqda. Ularning bobosi va onasi Ishtixon tuman tibbiyot birlashmasida davolanmoqda.
Zamon.uz muxbiri hozirda voqea joyida bo‘lib turibdi. Bu bo‘yicha tez orada batafsil reportaj eʼlon qilinadi.
