Buxoroda MIB orqali fuqaroning 65 mln qarzi undirib berildi
Fuqaro qo‘llangan cheklov va taqiqlardan so‘ng qarzini to‘liq to‘lashga majbur bo‘lgan.
Birovga qarz berish – savobli ish. Ammo ayrim hollarda qarz oluvchining muammosi hal bo‘lsa-da, qarz beruvchi uchun muammo yuzaga keladi. Afsuski, sudlarda ko‘rilayotgan nizolarning katta qismi aynan qarz oldi-berdisi bilan bog‘liq.
Buxoro shahar bo‘limi ish yurituvidagi fuqarolik ishlari bo‘yicha Buxoro tumanlararo sudining ijro hujjatiga ko‘ra, qarzdor X.G.dan undiruvchi O.N. foydasiga 65 883 333 so‘m qarz undirish belgilangan.
Qarzdor ijro hujjati mazmuni bilan tanishtirilib, qarzni ixtiyoriy ravishda to‘lash uchun muddat berilgan. Biroq talablar bajarilmagach, qarzdorga tegishli barcha mol-mulklarga taqiq qo‘yildi hamda uning respublikadan chiqish huquqi vaqtincha cheklandi.
Shuningdek, qarzdorlik to‘liq qoplanmaguniga qadar uning pensiyasining 50 foizini ushlab qolish to‘g‘risida pensiya ta’minoti organiga talabnoma yuborildi.
Amaldagi qonunchilikka muvofiq qo‘llangan cheklov va taqiqlardan so‘ng, qarzdor qarzini to‘liq to‘lashga majbur bo‘ldi.
