Namanganda MIBdan yashirilgan mashina 7 soatda topildi
Fuqaro bankka garov sifatida qo‘ygan avtomobilini boshqa odamga sotib, uni yashirib qo‘ygan. MIB tomonidan o‘tkazilgan qidiruvda u topilib, jarima maydonchasiga joylashtirilgan.
Majburiy ijro byurosi Namangan viloyat boshqarmasi tomonidan o‘tkazilgan tezkor tadbir natijasida bank garovida bo‘lgan qora rangli JETOUR avtomashinasi aniqlandi.
Maʼlum bo‘lishicha, fuqarodan bank foydasiga 282 502 421 so‘m miqdoridagi qarzdorlikni undirish belgilangan.
Qarzdor bir necha bor ogohlantirilgan bo‘lishiga qaramasdan, qarzni ixtiyoriy ravishda to‘lamagan. Shundan so‘ng undiruv garovga qo‘yilgan avtotransport vositasiga qaratildi. Olib borilgan o‘rganishlar davomida JETOUR boshqa shaxsga sotib yuborilgani maʼlum bo‘ldi.
Transport vositasi boshqa xonadonga yashirib qo‘yilgani aniqlandi. MIB xodimlari tomonidan qariyb 7 soat davom etgan ijro harakatlari natijasida garovdagi, bozor qiymati 344 842 400 so‘m bo‘lgan avtomashina topildi.
Avtomashina belgilangan tartibda jarima maydoniga joylashtirildi.
