O‘zbekistondagi 1700 dan ortiq masjidda Ramazonda “Xatmi Qur’on” o‘tkaziladi
“Xatmi Qur’on” tadbirlariga 3 642 nafar qori jalb qilingan.
Din ishlari bo‘yicha qo‘mita, O‘zbekiston musulmonlari idorasi hamda tegishli vazirlik va idoralar tomonidan O‘zbekistonda joriy yilgi Ramazon oyiga barcha tashkiliy chora-tadbirlar ko‘rildi.
Qayd etilishicha, Ramazon oyini diniy va milliy qadriyatlarga uyg‘un holda o‘tkazish uchun barcha tashkiliy sharoitlar yaratildi. Joriy yil 16-fevral kuni “Muborak Ramazon oyini munosib tarzda o‘tkazish to‘g‘risida”gi qaror qabul qilinib, uning asosida “Ramazon – mehr-muruvvat, ahillik va shukronalik oyi” ezgu g‘oyasi doirasida amalga oshiriladigan vazifalar belgilandi.
Ma’lumotlarga ko‘ra, respublikada faoliyat yuritayotgan 2 148 ta masjidning 2 101 tasida taroveh namozlari ado etiladi. Shundan 1 762 ta masjidda “Xatmi Qur’on” tadbirlari tashkil etiladi. Ushbu jarayonlarga 3 642 nafar malakali qori jalb etilgan.
Shuningdek, so‘nggi yillarda shakllangan ijobiy tajribadan kelib chiqib, “Xatmi Qur’on” tadbirlari barcha masjidlarda bir vaqtda boshlanib, Ramazon oyining 27-kechasi — Laylatul Qadr kechasida yakunlanishi rejalashtirilgan.
Taroveh tadbirlarini tartibli va xavfsiz o‘tkazish maqsadida ichki ishlar organlari, Milliy gvardiya, yong‘in xavfsizligi xizmatlari hamda 2 104 ta maxsus texnika jalb etiladi.
