O‘zbekistonda 2025 yilda 12 mingdan ortiq fuqaro firibgarlikda ayblanib sudlangan
Aybdorlarga jarima, majburiy ishlar, cheklash va ozodlikdan mahrum qilish jazolari tayinlangan.
O‘zbekistonda firibgarlik jinoyati bo‘yicha sudlangan shaxslar soni maʼlum qilindi. Oliy sud matbuot xizmati bergan maʼlumotga ko‘ra, 2025-yil davomida mamlakatda Jinoyat kodeksining 168-moddasi (firibgarlik) bilan bog‘liq jinoyatlar bo‘yicha 12 mingdan ortiq fuqaro jinoiy javobgarlikka tortilgan.
Keltirilishicha, mazkur modda doirasida jami 12 749 nafar shaxsga nisbatan turli jazo choralar qo‘llanilgan. Jumladan, ayblanuvchilarga jarima, muayyan huquqlardan mahrum qilish, axloq tuzatish ishlari, majburiy jamoat ishlari, ozodlikni cheklash hamda ozodlikdan mahrum qilish kabi jazolar tayinlangan. Shuningdek, hisobotda 137 nafar shaxsga nisbatan shartli jazo qo‘llangani qayd etilgan.
Statistik maʼlumotlarga ko‘ra, firibgarlik bilan bog‘liq jinoyat ishlari eng ko‘p Toshkent shahri, Farg‘ona, Samarqand, Namangan va Toshkent viloyatlarida ko‘rib chiqilgan.
