Rossiya va Ukraina o‘rtasidagi urush bu yil ham tugamaydi — OAV
Reuters manbalariga ko‘ra, Moskva muzokaralardan sanksiyalarni yumshatish uchun foydalanmoqda, tinchlik kelishuvi esa bu yil imkonsiz.
Ismini oshkor qilmaslik sharti bilan Reuters bilan gaplashgan besh nafar Yevropa razvedka rahbari Rossiya urushni yakunlashni istamayotganini bildirgan. Ulardan to‘rt nafari Moskva AQSH ishtirokidagi muzokaralardan sanksiyalarni yumshatish va biznes kelishuvlarini ilgari surish uchun foydalanayotganini aytgan.
Bu hafta Jenevada bo‘lib o‘tgan so‘nggi raund ham kirgan muzokaralar “muzokaralar teatri”, — deya baholagan Yevropa razvedkasi rahbarlaridan biri.
Reuters yozishicha, bu bayonotlar Yevropa poytaxtlari va Oq uy o‘rtasida “qarashlardagi hayratlanarli tafovut” mavjudligini ko‘rsatadi. Ukraina tomoniga ko‘ra, Oq uy AQSH Kongressidagi noyabr oyidagi oraliq saylovlardan oldin — iyun oyiga qadar tinchlik kelishuviga erishishni istamoqda. AQSH prezidenti Donald Trump esa Rossiya prezidenti Vladimir Putin kelishuvga tayyorligiga ishonishini aytgan.
“Rossiya tinchlik kelishuviga intilmayapti. U o‘zining strategik maqsadlariga erishmoqchi — va bu maqsadlar o‘zgarmagan”, — degan Yevropa razvedkasi rahbarlaridan biri.
Ularning aytishicha, bu maqsadlar qatoriga Vladimir Zelenskiyni hokimiyatdan chetlatish va Ukrainani Rossiya bilan G‘arb o‘rtasida “neytral bufer hudud”ga aylantirish kiradi.
Yana bir razvedka rahbarining taʼkidlashicha, Rossiya tezkor tinchlikka muhtoj emas va uning iqtisodiyoti “halokat yoqasida emas”.
