Rossiya va Eron Tramp tahdidlari fonida Hurmuz bo‘g‘ozida qo‘shma harbiy mashg‘ulot o‘tkazdi
Harbiy tayyorgarlik Jenevada AQSH va Eron o‘rtasida bo‘lib o‘tgan muzokaralardan so‘ng boshlandi.
Eron va AQSH munosabatlari taranglashayotgan vaqtda bugun, 19 fevral kuni Bandar Abbos sohili yaqinida, Hurmuz bo‘g‘oziga tutash hududda Eron va Rossiya harbiy mashg‘ulot o‘tkazdi.
Dushanba kuni esa Eron qurolli kuchlarining mafkuraviy qanoti hisoblangan Islom inqilobi qo‘riqchilari korpusi (IRGS) strategik ahamiyatga ega Hurmuz bo‘g‘ozida mashg‘ulotlar boshladi. Bu mintaqada joylashtirilgan AQSH harbiy-dengiz kuchlariga ochiq signal sifatida baholanmoqda.
Mashg‘ulotlarning asosiy maqsadi — dengiz xavfsizligini mustahkamlash va ikki davlat flotlari o‘rtasidagi hamkorlikni chuqurlashtirish. Mashg‘ulotlar qancha davom etishi bo‘yicha aniq maʼlumotlar berilmadi.
Bu harbiy mashg‘ulot seshanba kuni Jenevada Ummon vositachiligida o‘tgan muzokaralarning ikkinchi bosqichidan so‘ng Eron nisbatan ijobiy kayfiyat bildirgan bir paytga to‘g‘ri keldi.
Avvalgi muzokaralar 2025 yil iyun oyida Isroilning Eronga bergan misli ko‘rilmagan zarbasidan so‘ng barbod bo‘lgan edi. Bu hodisa 12 kunlik urushga sabab bo‘lib, unda AQSH ham qisqa muddat ishtirok etgan.
AQSH prezidenti Donald Tramp mintaqaga katta harbiy-dengiz kuchlarini joylashtirganini va buni “armada” deb atagan.
Eron rasmiylari AQSH bilan keskinlik kuchaygan paytlarda bir necha bor Hurmuz bo‘g‘ozini yopish bilan tahdid qilgan, biroq u hozirgacha hech qachon to‘liq yopilmagan.
Dunyo bo‘ylab neft va suyultirilgan gaz tashuvlarining muhim yo‘lagi bo‘lgan Hurmuz bo‘g‘ozi ilgari ham bir necha bor turli hodisalarga sahna bo‘lgan va AQSH–Eron muzokaralari fonida bosim kuchaygani sabab yana diqqat markaziga qaytdi.
Seshanba kuni Eron mazkur bo‘g‘ozda o‘tkazayotgan mashg‘ulotlari vaqtida “xavfsizlik sababli” uni bir necha soatga qisman yopishini eʼlon qildi.
