Afg‘onistonda erkak shifokorlar ayol bemorlarga “mahram” deb eʼlon qilindi
Biroq diniy ekspertlar bu qarorni islomiy prinsiplarga mos emas deb tanqid qilmoqda.
Tolibon hukumatining qaroriga ko‘ra, erkak shifokorlar klinik sharoitda ayol bemorlarni davolashda “mahram” — diniy jihatdan ruxsatli qarindosh sifatida qaraladi. Bu haqida Afg‘oniston Tolibon boshqaruvidagi Aloqa vaziri Hamdulla Nomani maʼlum qildi.
Nomani 18 fevral kuni Kobulda shifokorlar bilan o‘tkazilgan tadbirda ayol bemorlarni davolash paytida erkak shifokorlar uchun maxsus diniy vakolat taqdim etilgani haqida gapirdi.
“Men, vazir sifatida, shahrimizda ayolning yuziga qarashga haqli emasman. Lekin sizga, shifokorlarga, ayol bemor operatsiya stolida yotganida uning barcha jismoniy qismlarini ko‘rish va hatto kiyimlarini yechishga ruxsat etilgan”, — dedi u.
Nomani shifokorlardan ushbu huquqni ehtiyotkorlik bilan ishlatishni so‘radi va suiisteʼmol qilinmasligini taʼkidladi.
Bu o‘zgarish Tolibon boshqaruvi ostida ayollarni taʼlim va ishga qabul qilishda qatʼiy cheklovlar davom etayotgan bir paytda eʼlon qilindi. Afg‘oniston bo‘ylab qizlar o‘rta va oliy taʼlimdan chetlatilgan, ayollar esa ko‘plab kasb va sohalarda ishlash huquqidan mahrum qilingan.
Shuning uchun ham mamlakatda malakali ayol shifokorlar soni yildan-yilga kamayib bormoqda. Sog‘liqni saqlash sohasida ayollarning cheklangan ishtiroki tufayli, ko‘plab hududlarda bemor ayollar uchun mos shifokor topish juda qiyin bo‘lgan.
Ilgari Tolibonning mahram talab qilinishi bo‘yicha amaliyoti shuni nazarda tutganki, ayollar faqat yaqin erkak qarindoshi (mahram) bilan birga bo‘lsa yoki faqat ayol shifokorlar tomonidan xizmat ko‘rsa davolanishi mumkin edi. Bu esa ko‘pincha ayollarni sog‘liqni saqlash xizmatlaridan mutlaqo mahrum qilardi.
