AQSHning 13 shtati Trampni sudga berdi
Bunga qayta tiklanadigan energiya loyihalari uchun ajratilgan 1,2 milliard dollarlik moliyalashtirish bekor qilingani sabab bo‘lgan.
AQSHning 13 ta shtati federal hukumatning toza energiya loyihalari uchun ajratilgan moliyalashtirishni bekor qilish qarori yuzasidan Oq uy maʼmuriyatiga qarshi sudga murojaat qildi. Bu haqda Kaliforniya gubernatori matbuot xizmati maʼlum qildi deydi TASS.
Maʼlumotlarga ko‘ra, Kaliforniya boshchiligidagi shtatlar koalitsiyasi Kongress tomonidan tasdiqlangan qayta tiklanadigan energiya va infratuzilma loyihalari uchun mo‘ljallangan 1,2 milliard dollarlik mablag‘ning bekor qilinganini noqonuniy deb hisoblamoqda. Daʼvo arizasini Kolorado, Vashington, Konnektikut, Illinoys, Merilend, Massachusets, Nyu-Jersi, Nyu-York, Oregon, Rod-Aylend, Vermont va Viskonsin shtatlari rasmiylari ham qo‘llab-quvvatlagan.
Kaliforniya gubernatori Gavin Nevsom federal hukumatning mazkur qarorini tanqid qilib, moliyalashtirishni to‘xtatish yuz minglab ish o‘rinlari yaratilishiga tahdid solishi hamda sog‘liqni saqlash sohasida yiliga milliardlab dollar miqdoridagi iqtisodiy samaraga salbiy taʼsir ko‘rsatishi mumkinligini taʼkidladi. Uning so‘zlariga ko‘ra, ushbu qaror mamlakatning toza energiya sohasidagi global raqobatbardoshligiga ham putur yetkazadi.
