Buxoro va Navoiyda kuchli havo ifloslanishi kuzatildi
Ayrim joylarda PM2.5 mayda dispersli zarrachalari ruxsat etilgan meʼyordan 4,3-12,6 marta oshib ketdi.
Bugun, 20 fevral kuni Buxoro va Navoiy viloyatlarida atmosfera havosining ifloslanishi kuzatildi. Bu haqida Gidrometeorologiya xizmati agentligi maʼlum qildi.
Bildirilishicha, Buxoro viloyati hududida kuchli shamol esmoqda. Shamol tezligi soat 20:00 holatiga 19 M/S-gacha kuchaygani qayd etilgan.
Navoiy viloyatida ham kuchli shamol esmoqda. Shamol tezligi soat 20:00 holatiga 20 M/S-gacha kuchaygani qayd etilgan. Shamol o‘z o‘rnida chang zarrachalarini yerdan atmosferaga ko‘tarilishiga sabab bo‘lmoqda.
2026 yil 20 fevral kuni avtomatik monitoring stansiyasi maʼlumotlariga ko‘ra, Buxoro hududida soat 18:00 dan 19:00 gacha atmosfera havosidagi PM10 mayda zarrachalarining miqdori 1026-2979 mkg/m3 ni tashkil etdi, bu ruxsat etilgan meʼyordan 2,1-5,9 marta oshib ketdi.
PM2.5 mayda dispersli zarrachalarining tarkibi 151-440 mkg/m3 ni tashkil etdi, bu ruxsat etilgan meʼyordan 4,3-12,6 marta oshib ketdi.
Navoiy hududida soat 20:00 atmosfera havosidagi PM10 mayda zarrachalarining miqdori 1724 mkg/m3 ni tashkil etdi, bu ruxsat etilgan meʼyordan 3,4 marta oshib ketdi.
PM2.5 mayda dispersli zarrachalarining tarkibi 298 mkg/m3 ni tashkil etdi, bu ruxsat etilgan meʼyordan 8,5 marta oshib ketdi.
Qo‘shimcha qilinishicha, ifloslantiruvchi moddalar miqdori SanQvaM 0053-23 bilan taqqoslanadi. Atmosfera havosida PM10 mayda zarrachalarning maksimal ruxsat etilgan konsentratsiyasi 500 mkg/m3.
PM2,5 mayda dispersli zarrachalarning o‘rtacha yillik ruxsat etilgan konsentratsiyasi 35 mkg/m3.
