Toshkent va Namangan osmonida noma’lum yorqin jism uchishi kuzatildi
Astronomiya instituti mutaxassislari tomonidan mazkur holat yuzasidan dastlabki o‘rganishlar olib borilmoqda.
Ijtimoiy tarmoqlarda Kosmonavtlar metro bekati yaqinida olingan videomateriallar keng tarqaldi. Unda osmonda noma’lum yorqin jism harakatlangani aks etgani kuzatilgan.
Mazkur holat yuzasidan O‘zbekiston Respublikasi Fanlar akademiyasi Astronomiya instituti mutaxassislari tomonidan dastlabki o‘rganish ishlari olib borildi. Hozirgi vaqtga qadar videoda qayd etilgan hodisaning meteorit tushishi yoki boshqa tabiiy yoxud texnogen manba bilan bog‘liq ekani rasman tasdiqlanmagan. Yer yuzasiga yetib kelgan qoldiqlar mavjud bo‘lmagan taqdirda hodisaning aniq tabiatini ilmiy jihatdan tasdiqlash imkoni yo'q.
Institut ma’lumotiga ko‘ra, meteoroidlar Quyosh tizimida harakatlanuvchi kichik qattiq jismlar bo‘lib, ular Yer atmosferasiga kirganda kuchli qizish natijasida yorqin iz qoldiradi va bu hodisa meteor deb ataladi. Agar jism atmosferada to‘liq yonib ketmay, Yer yuzasiga yetib kelsa, u meteorit sifatida qayd etiladi.
Shuningdek, ijtimoiy tarmoqlarda Namangan viloyatida obyekt qoldiqlari topilgani haqidagi xabarlar ham tarqalgan.
Namangan viloyatida yashovchi aviaspotter Mahmudxon Odilxonovning Gazeta.uz'ga bergan ma’lumotiga ko‘ra, taxminan soat 12:30—13:00 oralig‘ida hududda kuchli shovqin eshitilgan hamda yer qimirlagandek sezilgan. U mazkur vaqtda aeroport yaqinida samolyotlarni kuzatish maqsadida bo‘lganini bildirgan.
Guvohning so‘zlariga ko‘ra, dastlab hodisa aeroport yaqinidagi “Yuksalish” hududi tomonda yuz bergan bo‘lishi mumkin degan taxmin paydo bo‘lgan. Keyinchalik u uyiga qaytgach, oila a’zolari ham kuchli ovozni eshitganini va shovqin Chust tomondan kelgandek tuyilganini aytgan.
Shuningdek, guvoh hodisadan so‘ng osmonda qora tutun kuzatilganini va u taxminan ikki soat davomida saqlanib turganini qayd etgan. Uning ta’kidlashicha, qo‘shimcha shovqin eshitilgach, osmonda qoramtir tutun izlari yanada aniq ko‘ringan va u aeroport hududidan uyiga yetib kelguniga qadar saqlanib qolgan.
Mahmudxon Odilxonov yana voqea sodir bo‘layotgan paytda tanishlaridan xabarlar kelganini, ijtimoiy tarmoqlarda esa Toshkent osmonida bir necha soniya davomida yorqin obyekt ko‘ringani haqida yozilganini bildirgan. Uning so‘zlariga ko‘ra, vaqtlarni solishtirganda mazkur xabarlar hodisa kuzatilgan vaqt bilan mos kelgan.
Hozirgi vaqtda ushbu guvohlik ma’lumotlari tegishli mutaxassislar tomonidan umumiy o‘rganish materiallari doirasida tahlil qilinmoqda. Holatning aniq sabablari va kelib chiqishi yuzasidan rasmiy xulosa qo‘shimcha tekshiruv natijalariga ko‘ra e’lon qilinishi kutilmoqda.
Mutaxassislar obyektning ehtimoliy traektoriyasi hamda aniqlangan shubhali qoldiqlarni o‘rganish ishlarini davom ettirmoqda. Qo‘shimcha ma’lumotlar aniqlanishi bilan jamoatchilikka rasman xabar beriladi.
