Toshkentdagi mehmonxonada hamkasbiga shilqimlik qilgan bankirga nega jinoiy ish ochilmadi?
Ijtimoiy tarmoqlarda muhokama qilinayotgan holat yuzasidan rasmiy izoh berildi.
Ijtimoiy tarmoqlarda namanganlik bank xodimining Toshkentdagi mehmonxonalardan birida ayol hamkasbiga nisbatan sodir etgan xatti-harakati va sud tomonidan tayinlangan jazo turli talqinlar bilan muhokama qilinmoqda.
Muhokamalarda go‘yoki erkakning harakatlarida jinoyat alomatlari ko‘rinib tursa-da, 5 sutka maʼmuriy qamoq jazosi bilan qutilib qolganiga alohida urg‘u berilmoqda.
Mazkur holat yuzasidan Toshkent shahar sudlari rasmiy bayonot berdi.
Aniqlik kiritilishicha, dastlab mazkur maʼmuriy huquqbuzarlikka doir ish 2025 yilning 25 dekabr kuni jinoyat ishlari bo‘yicha Chilonzor tuman sudida ko‘rilib, huquqbuzarning xatti-harakatlarida jinsiy erkinlikka qarshi jinoyat alomatlariga aniqlik kiritish va jinoyat ishi qo‘zg‘atish masalasini muhokama qilish uchun ish materiallari sudning ajrimi bilan tuman prokuraturasiga yuborilgan.
Takroriy surishtiruvlarda jinoyat alomatlari tasdig‘ini topmagani bois ish materiallari MJtKning 41-1-moddasi (shahvoniy shilqimlik qilish) bilan sudga yuborilgan va sud qarori bilan huquqbuzarga nisbatan ushbu modda sanksiyasida ko‘rsatilgan eng yuqori jazo tayinlangan.
