Yangi Toshkentda “Boylar shaharchasi” qurilayotgani aytilmoqda
Har bir dona villasi 2-3 mln dollar atrofida bo‘ladigan uylar yuzasidan izoh berildi.
Ijtimoiy tarmoqlarda Yangi Toshkent hududida 2030 yilg borib topshirilishi kutilayotgan mega loyihada odatiy kvartiradan tortib har bir dona villasi 2-3 mln dollar atrofida bo‘ladigan boylar shaharchasi ham barpo etilayotgani haqida xabarlar tarqalmoqda.
Bunga Yangi Toshkent direksiyasi matbuot xizmati munosabat bildirib, ushbu xabarlar asoslanmagan va noto‘g‘ri ekanini maʼlum qildi.
Qayd etilishicha, Yangi Toshkent loyihasida hech qanday boylar shaharchasi ko‘zda tutilmagan. Shahar qurilishining birinchi bosqich maketida mavjud kottejlar kelgusida xorijiy mamlakatlarning O‘zbekistondagi favqulodda va muxtor elchilari hamda xalqaro tashkilot vakillarining turar joyi bo‘lishi ko‘zda tutilmoqda.
Maʼlumot uchun, Bugungi kunda birinchi bosqich, 6 ming gektar hududda qurilish ishlari jadal olib borilmoqda. 2033 yilgacha 600 ming aholi uchun zamonaviy infratuzilma barpo etilishi belgilangan. Loyiha to‘liq yakunlanganda esa Yangi Toshkent 2 million odam yashaydigan megapolisga aylanadi.
