Amerikada 11 yoshli bola videoo‘yin sabab otasini o‘ldirib qo‘ydi
U otasi videoo‘yin qurilmasini olib qo‘yganidan jahli chiqqan.
AQSHning Pensilvaniya shtatida 11 yoshli bola otasini otib o‘ldirishda ayblanmoqda. Fojia joriy yilning 13-yanvar kuni sodir bo‘lgan.
Tergov maʼlumotlariga ko‘ra, voqea kechasi ota-ona farzandining videoo‘yin qurilmasini olib qo‘yganidan so‘ng yuz bergan. O‘yin o‘ynashiga ruxsat berilmagani bolada kuchli jahl uyg‘otgan.
Shundan so‘ng bola qurilmani izlash jarayonida uyda qurol saqlanadigan seyf kalitini topib olgan. U seyfdan revolver olib, uni o‘qlab, uxlab yotgan 42 yoshli otasiga qarata o‘q uzgan. Erkak voqea joyida halok bo‘lgan.
Hodisa taxminan tungi soat 03:20 atrofida sodir bo‘lgan. Bola keyinchalik onasiga va politsiyaga qilgan ishini tan olgan.
Bolaning yoshi kichik bo‘lishiga qaramay, Pensilvaniya qonunchiligiga muvofiq unga kattalar kabi qotillik ayblovi qo‘yilgan. Sudda bola qurolni o‘zi sozlab, otasini uxlab yotgan paytda otganini tan olgan. Kecha, 20 fevral kuni u sud oldiga kishanlangan holda olib chiqilgan.
