Endi MIBda ishlar yanada tezlashadi: tizimga sunʼiy intellekt joriy qilinyapti
1-martdan boshlab MIB faoliyatiga ham sunʼiy intellekt texnologiyalari joriy qilinadi. Ish hajmining 30 foiz qismi unga yuklatiladi. Bu orqali bir qator xato-kamchiliklar oldi olinadi va ish samaradorligi oshiriladi.
Kecha, 20-fevral kuni O‘zbekiston Milliy matbuot markazida Bosh prokuratura huzuridagi Majburiy ijro byurosi rahbariyati hamda masʼul xodimlari bilan “Ijro etish sohasida o‘tgan davrda amalga oshirilgan ishlar, sohadagi yangiliklar va raqamlashtirish masalalari” mavzusida matbuot anjumani bo‘lib o‘tdi.
Anjuman doirasida sohada amalga oshirilgan ishlar bilan bir qatorda tizimda kutilyoatgan yangiliklar haqida ham batafsil maʼlumot berildi, deya xabar bermoqda unda ishtirok etgan Zamon.uz muxbiri.
Jumladan, joriy yilning 1 martidan boshlab MIB faoliyatiga ham sunʼiy intellekt texnologiyalari joriy qilinadi. Ish hajmining 30 foiz qismi unga yuklatiladi. Bu orqali bir qator xato-kamchiliklar oldi olinadi va ish samaradorligi oshiriladi.
Bildirilishicha, baʼzi holatlarda ijro hujjatlarining qog‘oz shakli bilan sud tomonidan yuborilgan elektron shakl o‘rtasida tafovutlar bo‘ladi. Yaʼni ijro hujjatida boshqa shaxsning ism-familiyasi, sud yuborgan elektron hujjatda esa boshqa fuqaroning maʼlumotlari yoziladi. Buning ortidan ko‘p hollarda aslida qarzdor bo‘lmagan fuqaroga bir qator cheklovlar qo‘yiladi yoki ijro hujjatlari sudga qaytarib yuboriladi.
Endilikda sunʼiy intellekt texnologiyasi ikkala hujjatni solishtirib ko‘rib, xato-kamchiliklarni aniqlashga yordam beradi. Shu tariqa sudlardan yuboriladigan ijro hujjatlarini qabul qilish va qaytarishda inson omili minimal darajada kamaytiriladi.
Shuningdek, MIB organlarining odatiy ish vaqtidan tashqari vaqtlarda murojaatchilarning savollariga javob beradigan sunʼiy intellekt chat-boti yaratiladi.
Tizimda sunʼiy intellekt imkoniyatlari protsessual hujjatlarini rasmiylashtirish darajasigacha yetkaziladi.
Taʼkidlanishcha, MIB xodimlari endilikda planshet va bodi-kameralar bilan ham taʼminlanmoqda. Bu ijro harakatlari davomida yuzaga kelishi mumkin bo‘lgan noxush holatlarning oldini olishga qaratilgan.
Planshetlar bilan taʼminlash orqali ish samaradorligi oshiriladi. Yaʼni xodim endilikda ofisga borib bajaradigan ishlarini planshet orqali ham amalga oshira oladi.
"MIB tizimidagi yuklamalarni sohani raqamlashtirish va xodimlarni kerakli zamonaviy vositalar bilan taʼminlash orqali kamaytirishimiz mumkin", dedi MIB axborot xizmati rahbari Farruh Toshpo‘latov.
Anjuman davomida aliment undiruvlari bilan bog‘liq muammolarga ham eʼtibor qaratildi. Maʼlumotlarga ko‘ra, respublika miqyosida aliment to‘lovchilarning 61 foizi doimiy ish joyiga va daromadiga ega bo‘lmagani sababli aliment to‘lovlarini undirish jarayoni qiyinlashgan.
Buning yechimi sifatida qarzdor fuqarolar uchun mehnat yarmarkalari tashkil etib, ularning bandligini taʼminlagan holda undiruvlar amalga oshirilmoqda. Bu borada 2025 yilda aliment to‘lash istagi bo‘la turib, lekin ish bandligi bo‘lmagan 26 753 nafar fuqarolar ishga joylashtirilgan.
Moddiy yordamga muhtoj farzandlar foydasiga 3,1 trln so‘mlik aliment mablag‘lari undirilgan.
“Aliment to‘lovlari” jamg‘armasi hisobidan 588 nafar undiruvchilarga 26,8 mlrd so‘m pul mablag‘lari to‘lab berilgan.
Bundan tashqari, olib borilgan tushuntirish ishlari natijasida 13 834 ta oilalar yarashtirilgan.
