Isroil armiyasini yuqori jangovar shaylik holatiga keltirdi
Bunga AQSHning Eronga zarba berish ehtimoli sabab bo‘lgan.
Isroil armiyasi (SAXAL) vakili Efi Defrin o‘z bayonotida harbiylar mintaqadagi vaziyatni diqqat bilan kuzatayotganini maʼlum qildi. Uning so‘zlariga ko‘ra, operatsion vaziyatdagi har qanday o‘zgarishga tezkor javob berishga tayyorgarlik ko‘rilgan. Defrin, shuningdek, fuqarolarni faqat rasmiy manbalarga ishonishga chaqirgan.
Avvalroq ommaviy axborot vositalari AQSH “tez orada” Eronga zarba berishi mumkinligi haqida xabar tarqatgan edi. Shu fonda Isroil ichki front qo‘mondonligiga yuqori darajada shaylik holatiga o‘tish buyurilgani aytilmoqda.
Isroilning 12-kanali maʼlumotiga ko‘ra, agar AQSH Eronga hujum qilsa, Isroil ham harbiy harakatlarga qo‘shilishi mumkin.
Bir qator nashrlar tomonidan eʼlon qilingan xabarlarda AQSH prezidenti Donald Tramp Eronga keng ko‘lamli zarba berish yoki bermaslik masalasida qaror qabul qilish arafasida ekani aytilmoqda. Diplomatik yo‘llar torayib borayotgan bir paytda harbiy variantlar ham ko‘rib chiqilayotgani taʼkidlanmoqda.
