Samarqandda bankdan qarzdor fuqaro mashinasidan ayrildi
U mashinasini MIB xodimlaridan yashirish maqsadida faqat tunda uyiga olib kelib, kunduzi boshqa joyda saqlagan.
Majburiy ijro byurosi Samarqand viloyat boshqarmasi Qidiruv shoʻbasi xodimlari tomonidan olib borilgan tezkor tadbirlar natijasida bank foydasiga undirilishi lozim bo‘lgan qarzdorlik bilan bog‘liq navbatdagi ijro harakati taʼminlandi.
Maʼlum bo‘lishicha, Samarqand shahrida yashovchi fuqaro R.U.dan Mikrokreditbank ATB foydasiga 19 million so‘m qarzdorlikni undirish belgilangan va unga tegishli “Chevrolet Gentra” rusumli avtotransport vositasiga qidiruv eʼlon qilingan.
Qarzdor transport vositasini faqat tunda uyiga olib kelinib, kunduzi boshqa joyda saqlanayotgani aniqlangan. Olib borilgan tezkor-qidiruv tadbirlari natijasida avtomashina qarzdorning yashash manzilida aniqlandi.
Natijada faqat tunda uyiga keladigan qarzdor transporti belgilangan tartibda xatlanib, jarima maydonchasiga joylashtirildi.
