O‘zbekistonliklar ramazonda beriladigan yordam puli bo‘yicha firibgarlikdan ogohlikka chaqirildi
Firibgarlar turli yo‘llar, hatto soxta saytlar yaratib, pulni o‘g‘irlashga urinishlari mumkin.
Avvalroq Prezident qarori bilan muqaddas Ramazon oyi arafasida aholining ijtimoiy himoyaga muhtoj qatlamlariga bir martalik moddiy yordam berilishi belgilangandi.
Ekspertlar bunday xabarlardan so‘ng firibgarlar turli yo‘llar, hatto soxta (feyk) saytlar yaratib, pulni o‘g‘irlashga urinishlari mumkinligidan ogohlantirdi.
Firibgarlikdan o‘zingizni quyidagicha himoya qilishingiz mumkin:
— Hech qanday ariza shart emas: Pul mablag‘lari 1 martga qadar sizning ijtimoiy kartangiz yoki plastik kartangizga AVTOMATIK tushadi.
— Agar sizga "pulni olish uchun ariza bering" deyishsa — bu yolg‘on!
— SMS-kodni bermang: Bankdan yoki 5500 xizmatidan kelgan maxfiy kodni hech kimga (hatto o‘zini bank xodimi yoki mahalla raisi deb tanishtirsa ham) aytmang.
— Shubhali havolalarga kirmang: "To‘lovni qabul qilib oling" degan mazmundagi Telegram-botlar yoki rasmiyga o‘xshash soxta saytlarga karta maʼlumotlarini kiritmang.
— Oltin qoida: Agar sizdan pul tushirib berish uchun kod so‘rashsa yoki qaysidir saytga karta raqamingizni yozishni talab qilishsa, bilingki — qarshingizda FIRIBGAR turibdi!
Shaxs ijtimoiy reyestrga kiritilgan oila aʼzosimi yoki yo‘qligini rasmiy my.gov.uz portali orqali tekshirishi mumkin. Davlat tashkilotlari sizga hech qachon "pulingizni olish uchun havolaga kiring" deb SMS yubormaydi.
Qarorga ko‘ra, “Ijtimoiy reyestr”dagi davlat taʼminotida bo‘lgan oilalarga, o‘zgalar parvarishiga muhtoj yolg‘iz keksalar va nogironligi bo‘lgan shaxslarga hamda yetim va ota-ona qaramog‘idan mahrum bo‘lgan bolalar yashayotgan oilalarga 1 million so‘m miqdorida bir martalik yordam puli beriladi.
Shuningdek, “Ijtimoiy reyestr”dagi kambag‘al oilalarga, “Mahalla yettiligi” tomonidan shakllantirilgan qo‘shimcha ro‘yxatdagi ehtiyojmand oilalarga 500 ming so‘m miqdorida (bir martalik) yordam puli to‘lanadi.
Bundan tashqari, reyestrdagi oilalarning 6 ming nafar bemor aʼzolariga davolanish xarajatlari to‘liq qoplab beriladi.
