O‘zbekistonning davlat qarzi 47 mlrd dollarga yetdi
Shundan 85 foizi tashqi qarz hissasiga to‘g‘ri keladi.
2025 yil yakuniga kelib O‘zbekistonning jami davlat qarzi (tashqi va ichki) 46,85 mlrd dollarni tashkil etdi. Bu ko‘rsatkich yalpi ichki mahsulot (YAIM) ning 31,9 foiziga teng.
Iqtiosdiyot va moliya vazirligiga ko‘ra, davlat qarzining asosiy qismi — 39,82 mlrd dollari yoki 85 foizi tashqi qarz hissasiga to‘g‘ri keladi. Tashqi qarzning YAIMga nisbati esa 27,1 foizni tashkil etadi.
Tashqi qarzning 83 foizi xorijiy valyutada rasmiylashtirilgan. 40 foizi o‘zgaruvchan foiz stavkalariga ega, qarzning katta qismi uzoq muddatli, qisqa muddatli majburiyatlar deyarli mavjud emas.
Davlat qarzining qolgan qismi — 7,03 mlrd dollari yoki 15 foizi ichki qarz hissasiga to‘g‘ri keladi. Ichki qarzning yalpi ichki mahsulot (YAIM)ga nisbati esa 4,8 foizni tashkil etadi.
Maʼlumot uchun, O‘zbekiston qonunchiligiga ko‘ra, davlat qarzining YAIMga nisbati 60 foizdan oshib ketmasligi kerak. Hozirgi 32 foiz atrofidagi ko‘rsatkich xavfsiz daraja deb hisoblanadi.
