Pokiston tunda Afg‘onistonga hujum qildi
Hujum oqibatida o‘nlab odamlar halok bo‘lgan.
Kecha, 21 fevral kuni Pokiston harbiy aviatsiyasi Afg‘onistonning sharqiy hududlarida jangarilarga qarshi havo hujumlarini amalga oshirdi. Pokiston hukumati bu zarbalarini “razvetka maʼlumotlariga asoslangan, aniq nishonlarga qarshi operatsiyalar” deb atagan bo‘lsa, Afg‘oniston hukumati bunga qarshi eʼtiroz bildirdi.
Pokiston rasmiylari hujumlar davomida “Tehriki Tolibon Pakistan” (TTP) va uning aloqador guruhlariga zarba berilganini maʼlum qildi. Rasmiy bayonotga ko‘ra, ushbu guruhlar so‘nggi paytlarda Pokistonda uyushtirilgan o‘ta xavfli hujumlar ortida turgan bo‘lishi mumkin.
Pokiston hukumati, jumladan Islomoboddagi axborot vazirligi, hujumlarni “mamlakat xavfsizligini taʼminlash” chorasi deb atab, xalqaro hamjamiyatdan Afg‘onistonni bosim ostiga olishni talab qildi.
Afg‘oniston hukumati hujumlar oqibatida o‘nlab fuqarolar, xususan ayollar va bolalar ham halok bo‘lganini bildirgan. Dastlabki maʼlumotlarga ko‘ra, kamida 17 kishi, shu jumladan, bir nechta oilaning aʼzolari halok bo‘lgan.
Afg‘on rasmiylariga ko‘ra, zarba Bihsud tumanidagi uylarni nishonga olgan va bu uyda 12 nafar bola va o‘smir halok bo‘lgan. Shuningdek, ko‘plab odamlar jarohat olgani, aholi turar-joylari vayron bo‘lganiga oid fotosuratlar va videolar ijtimoiy tarmoqlarda tarqalmoqda.
Afg‘oniston Mudofaa vazirligi hujumni qoralab, Pokistonga munosib va o‘z vaqtida javob qaytarilishidan ogohlantirdi.
