Samarqanddagi hibsxonada tuman gaz xodimi vafot etgani aytilmoqda
Zamon.uz holat bo‘yicha izoh olish uchun viloyat IIB bilan bog‘landi. Maʼlumotlarga ko‘ra, marhumning qandli diabet kasalligi bo‘lgan.
Ijtimoiy tarmoqda Samarqand viloyatining Kattaqo‘rg‘on tumangaz taʼminoti korxonasi xodimi Kattaqo‘rg‘on shahridagi hibsxonadan o‘lik holda chiqqani aytilgan xabarlar tarqalmoqda.
Manbalarga ko‘ra, marhum Qodirjon Xayrullayev 35 yoshda bo‘lgan. Bugun soat 16:00 da marhumning janozasi o‘qilib, so‘nggi manzilga kuzatilgan.
U bundan biroz avval tuman hokimining yig‘ilishlaridan birida, hokimlik zalida qo‘lga olingani, ayni paytda u ayblanayotgan moddalar bo‘yicha tergov jarayoni ketayotgan bo‘lgani aytiladi.
Zamon.uz holat bo‘yicha izoh olish uchun Samarqand viloyati IIB axborot xizmati bilan bog‘landi.
Bildirilishicha, ayni paytda holat yuzasidan prokuratura organlari tomonidan tergov ishlari olib borilmoqda.
Viloyat IIB matbuot xizmati rahbari marhumning qandli diabet kasalligi bo‘lganini va shu kasallikdan vafot etgani xabar qilinganini qo‘shimcha qilgan.
