Surxondaryoda kuchuklarning qulog‘ini uzib tashlagan yigit qamaldi
U it bolalariga shafqatsiz munosabatda bo‘lib, bu harakati aks etgan videoni ijtimoiy tarmoqdagi sahifasiga joylagan.
Avvalroq Surxondaryo viloyatida fuqaro it bolalarining qulog‘ini majburlab yulib olganligi aks etgan video tarqalgandi. Holat yuzasidan viloyat Ekologiya boshqarmasi ham rasmiy munosabat bildirdi.
Qayd etilishicha, olib borilgan o‘rganishlar davomida Sherobod tumani Mehnatobod mahallasida yashovchi fuqaro O.Y. o‘zining ijtimoiy tarmoqdagi sahifasida itning 3 bosh bolasiga nisbatan shafqatsiz munosabatda bo‘lib, ularning quloq qismlarini qo‘l bilan yulib tashlaganligi aks etgan video materialni joylashtirgan.
Holat yuzasidan O‘zbekiston Respublikasi Maʼmuriy javobgarlik to‘g‘risidagi kodeksining 111-moddasi 2-qismiga asosan maʼmuriy bayonnoma rasmiylashtirilib, hujjatlar sudga yuborilgan.
Sud hukmiga muvofiq, fuqaro O.Y.ga nisbatan 10 kun maʼmuriy qamoq jazosi qo‘llanildi.
