Trampning qarorgohiga bostirib kirmoqchi bo‘lgan yigit otib tashlandi
U yarim tunda prezident qarorgohi oldida qo‘lida miltiq bilan paydo bo‘lgan.
21-fevraldan 22-fevralga o‘tar kechasi AQSH Prezidentining Floridadagi shaxsiy qarorgohi va dam olish maskani — Mar‑a‑Lago atrofida favqulodda holat yuz berdi. Soat taxminan 1:30 da 20 yoshlar atrofidagi yigit ov miltig‘i va yonilg‘i to‘ldirilgan idish bilan qarorgohda paydo bo‘lgan.
Uni ikki nafar Maxfiy xizmat agenti va sherif o‘rinbosari to‘xtatib, qo‘lidagi narsalarni tashlashni buyurgan. Yigit idishni yerga qo‘ygan, biroq ov miltig‘ini “o‘q uzish pozitsiyasiga” ko‘targan payt huquq-tartibot xodimlari tomonidan otib tashlangan. Oqibatda yigit voqea joyida vafot etgan.
Manbalarga ko‘ra, u amerikalik—Austin Tusker Martin bo‘lib, Shimoliy Karolinadan bo‘lgan. Yigitning oila aʼzolari uni bir necha kun oldin yo‘qolgan deb xabar qilgan.
Voqea sodir bo‘lgan payt prezident Donald Tramp va uning rafiqasi qarorgohda bo‘lmagan. Ular Vashingtondagi Oq uyda edi.
Ayni paytda mahalliy huquq-tartibot organlari voqea sabablarini aniqlash bo‘yicha surishtiruv ishlarini boshlagan. Yigitning maqsadi hozircha mavhumligicha qolmoqda.
