Eron Rossiya bilan 500 mln yevrolik maxfiy bitim tuzdi
Unga ko‘ra, Rossiya kompaniyasi Eronga uch yil davomida qurol-yarog‘ yetkazib beradi.
Eron va Rossiya o‘rtasida qurol-yarog‘ yetkazib berish bo‘yicha 500 million yevrolik maxfiy bitim tuzildi. Bu haqida Rossiya hujjatlariga hamda bitim tafsilotlaridan xabardor bir necha manbaga tayanib, Financial Times nashri yozmoqda.
Shartnoma shartlariga ko‘ra, Rossiyaning “Rosoboroneksport” davlat kompaniyasi Eronga uch yil davomida — 2027 yildan 2029 yilgacha, 500 ta “Verba” zenit-raketa majmuasi va 2,5 mingta 9M336 raketalarini yetkazib beradi.
Hujjatlarda bitta raketaning narxi 170 ming yevro, uchirish qurilmasi esa 40 ming yevro deb ko‘rsatilgan. Shartnomaning umumiy qiymati esa 495 mln yevroni (taxminan 586 mln dollar) tashkil qiladi.
Tehron Moskvaga mazkur shartnoma bo‘yicha rasmiy so‘rovni o‘tgan yilning iyul oyida Isroil bilan “12 kunlik urush” tugaganidan ko‘p o‘tmay yuborgan. Bunga Eronning havo hujumidan mudofaa tizimi sezilarli darajada zaiflashgani sabab qilib ko‘rsatilmoqda.
