Farg‘onadagi bog‘chalarda bolalar ommaviy zaharlandi
Hozirda 62 nafar bola shifoxonaga yotqizilgan.
Ijtimoiy tarmoqlarda Farg‘ona shahridagi davlat bog‘chalarida bolalarning ommaviy zaharlanishi yuz berganligi haqida xabarlar tarqalmoqda. Holat yuzasidan viloyat SSV rasmiy munosabat bildirdi.
Qayd etilishicha, viloyat yuqumli kasalliklar shifoxonasiga 21 fevral kuni soat 19:00 dan boshlab Farg‘ona shahar hududida joylashgan 2-sonli, 58-sonli va 61-sonli maktabgacha ta’lim tashkilotlari tarbiyalanuvchilari tana haroratini ko‘tarilishi, qorinda og‘riq, holsizlik, ko‘ngil aynishi, ich o‘tishi belgilari bilan murojaat bilan kelishgan.
Aniqlanishicha, bemorlarda qorin sohasida og‘riq, ich ketishi, haroratni ko‘tarilishi, ko‘ngil aynishi kabi sog‘lig‘ida salbiy holatlar kuzatilgan.
Shifoxonada davolovchi vrachlar tomonidan bemorlar tibbiy ko‘rikdan o‘tkazilib, “O‘tkir diareya kasalligi, alimentar etiologiyali” tashxisi bilan diyareya bo‘limiga yotqizilgan.
Hozirda bo‘limda 62 nafar bemorlar stasionar davolanayotgan bo‘lib, holati yaxshi.
Sanitariya-epidemiologik osoyishtalik va jamoat salomatligi boshqarmasi mutaxassislari bog‘chalarning oshxonalarida va ovqat yetkazib beruvchi korxonada tekshiruvlar o‘tkazib, bolalar iste’mol qilgan taomlardan laboratoriya namunalari olib tekshirmoqda.
