Jizzaxda fuqaro boshqa odamga kredit olib berib, o‘zining mashinasidan ayrildi
Maʼlum bo‘lishicha, amalda kreditni boshqa shaxs olgan va to‘lamasdan qoldirgan.
Jizzax viloyatining Sharof Rashidov tumanida fuqaro boshqa fuqaroga kredit olib berib, o‘zining mashinasidan ayrildi. Bu haqida MIB axborot xizmati Zamon.uz'ga maʼlum qildi.
Qayd etilishicha, Fuqarolik ishlari bo‘yicha sud qaroriga asosan, bank foydasiga qarzdor A.I.dan kredit qarzdorligini “KIA K5” rusumli avtomashinaga qaratish to‘g‘risidagi ijro varaqasi Majburiy ijro byurosining Sharof Rashidov tumani bo‘limi ish yurituviga kelib tushgan.
Olib borilgan majburiy ijro harakatlari davomida qarzdorga tegishli “KIA K5” rusumli avtomashina tuman hududida harakatlanayotgan vaqtida aniqlanib, jarima maydonchasiga joylashtirildi.
Kelgusida avtomashina auksion savdolari orqali sotilib, tushgan mablag‘ hisobidan mavjud kredit qarzdorligi qoplanishi rejalashtirilmoqda.
Qarzdorning aytishicha, avtomashina uning nomiga rasmiylashtirilgan bo‘lib, amalda kreditni boshqa shaxs olgan va to‘lamasdan qoldirgan.
