Namanganda ehtiyojmand oilalar uchun iftorliklar tashkil etilmoqda
Shuningdek, kam taʼminlangan oilalar holidan xabar olinib, ularga oziq-ovqat jamlanmalari tarqatilyapti.
Namangan viloyatida “Ramazon — mehr-muruvvat, ahillik va shukronalik oyi” shiori ostida iftorliklar tashkil etilmoqda. Bu haqida viloyat hokimligi xabar berdi.
“Ramazon – xayr-saxovat, mehr-muhabbat ulashiladigan oy. Bu oyda ko‘ngli o‘ksiklar, ehtiyojmand, kam taʼminlangan oilalar holidan xabar olinib, ularga yaxshiliklar qilinadi.
Namangan viloyatida ham kam taʼminlangan oilalar holidan xabar olinib iftorliklar tashkil etilmoqda. Xususan, viloyat bosh imom-xatibi Abdulloh domla Samatov Yangi Namangan tumani Axsikent mahallasida yashovchi ehtiyojmand oila xonadonida birga iftorlik qilib, Ramazon hadyalari topshirdi.
Xuddi shunday xayrli tadbirlar Namangan shahri va tumanlarida ham tashkil etildi. Kechaning o‘zida bosh imom-xatiblar tomonidan umumiy hisobda 14 ta oilaga kirilib, oziq-ovqat jamlanmalari tuhfa qilindi”, deyiladi xabarda.
