O‘zbekiston Prezidenti Rossiyada bolani qutqarib qolgan o‘zbekistonlikni mukofotladi
Shuningdek, unga Rossiya tomonidan ham pul mukofoti beriladigan bo‘ldi.
Rossiyaning Sankt-Peterburg shahrida 7-qavatdan tushib ketgan bolaning hayotini saqlab qolgan o‘zbekistonlik erkak “Jasorat“ medali bilan mukofotlandi. Bu haqida Prezident matbuot xizmati maʼlum qildi.
“O‘zbekiston Respublikasi Prezidentining farmoni bilan Rossiya Federatsiyasining Sankt-Peterburg shahrida sodir bo‘lgan favqulodda va murakkab vaziyatda o‘z joni va salomatligini xavf ostiga qo‘yib, ko‘p qavatli uyning yuqori qismidan qulayotgan yosh bolaga amaliy yordam ko‘rsatgani va uning hayotini saqlab qolgani uchun yurtdoshimiz Ibadullayev Xayrullo Saydullayevich “Jasorat“ medali bilan mukofotlandi”, deyiladi xabarda.
Shuningdek, Sank Peterburgda ishlovchi 36 yoshli Xayrullo Ibodullayev qahramonligi uchun Tigran Keosayan nomidagi mukofot bilan taqdirlangan va unga 1 mln rubl ham beriladi.
Maʼlumotlarga ko‘ra, Ibodullayev mazkur mukofotga sazovor bo‘lgan to‘rtinchi inson hisoblanadi. Mukofot RT va Rossiya Segodnya axborot agentliklari bosh muharriri tomonidan taʼsis etilgan. U bu tashabbusni Buguruslandagi ikki bog‘cha tarbiyachisining bolalarni pichoq ko‘targan shaxsdan himoya qilgan jasoratidan ilhomlanib yo‘lga qo‘ygan.
Eslatib o‘tamiz, Sankt-Peterburgning Petrozavodskaya ko‘chasida joylashgan ko‘p qavatli uyning ochiq derazasida planshet o‘ynab o‘tirgan 7 yoshli bola muvozanatini yo‘qotib, yiqilib tushgan. Biroq, karnizni ushlab qola olgan.
O‘zbekiston fuqarosi uni ko‘rib, derazadan uzoqlashishni so‘ragan. Biroq, bola karnizni ushlab turolmay, qo‘llarini qo‘yib yuborgan. Ko‘cha tozalayotgan erkak esa bolani ushlab qola olgan. Shundan so‘ng Xayrulla Ibodullayev uni o‘ziga keltirishga uringan. Oshxonada bo‘lgan ota va ona o‘g‘lining uyda yo‘qligini taxminan, 10 daqiqadan keyin sezgan. Maʼlum bo‘lishicha, bolaning autizm tashxisi bo‘lgan.
Ayni paytda bola reanimatsiyada, ahvoli barqaror. Uning bir necha joyi singan, jumladan, oyog‘i va ichki aʼzolari jarohatlangan. O‘zbekistonlik erkakning ham qo‘l panjalari va qovurg‘asi singan.
