Samarqandda uka o‘z akasini miltiq bilan otib o‘ldirib qo‘ydi
Hodisaga ular o‘rtasida ariqdan suv o‘tkazish masalasida yuzaga kelgan nizo sabab bo‘lgan.
Samarqand viloyatining Narpay tumanida uka o‘z akasini ov miltig‘i bilan otib o‘ldirib qo‘ydi. Holat yuzasidan Bosh prokuratura matbuot kotibi Hayot Shamsutdinov Zamon.uz'ga maʼlumot berdi.
Qayd etilishicha, voqea 12 fevral kuni soat 11:30 larda Narpay tumani “Ho‘jakarzon” mahallasi “Asilbek oltin baliqlari” fermer xo‘jaligi hududida yuz bergan.
Fuqaro A.S. ariqdan suv o‘tkazish masalasida akasi U.S. bilan o‘rtalarida kelib chiqqan kelishmovchilik sababli u bilan tortishib, janjal vaqtida o‘ziga tegishli “IJ-18” rusumli ov quroli bilan U.S.ga bir marotaba o‘q uzib, uni qasddan o‘ldirgan.
Sud-tibbiyot ekspertiza bo‘linmasining dastlabki maʼlumotida, marhum U.S.ning tanasida, yaʼni kalla, yuz, bo‘yin aʼzolarining ochiq shikasti, peshona chap lunj ikkala yelka bo‘g‘ini old yuzasi, o‘ng yelka sohalarida ov qurolidan o‘qli shikastlanish, ochiq kalla miya shikasti, peshona suyagini ochiq sinishi bosh miya to‘qimasini o‘qli shikastlanishi, yuz suyaklarini ochiq parchalanib sinishi, 4 va 5 bo‘yin umurtqalarining parchalanib sinishi, orqa miyaning o‘qli shikastlanishi tashxisi qo‘yilib, uning o‘limi tashqi qon ketishidan kelib chiqqanligi ko‘rsatilgan.
Mazkur holat yuzasidan 2026 yil 12 fevral kuni Narpay tuman prokuraturasi tomonidan A.S.ga nisbatan JKning 97-moddasi 1-qismi bilan jinoyat ishi qo‘zg‘atilib, u JPKning 221-moddasi tartibida ushlangan.
