Surxondaryoda “Mening maktabim” loyihasi doirasidagi korrupsion sxema fosh bo‘ldi
Ikki mansabdor jami 111 200 AQSH dollari hamda 567 mln so‘mni pora tariqasida olayotganda qo‘lga tushgan.
Surxondaryo viloyati taʼlim sohasida yirik korrupsion sxema fosh etildi. Bu haqida “Vodiy24” nashri xabar bermoqda.
Qayd etilishicha, viloyat Maktabgacha va maktab taʼlimi boshqarmasining sobiq boshlig‘i H.Mamadiyev hamda Termiz shahar bo‘limi sobiq rahbari S.Ro‘ziqulov katta miqdordagi pora bilan ushlangan.
Tergov maʼlumotlariga ko‘ra, korrupsion sxema Jarqo‘rg‘on tumanida amalga oshirilgan “Mening maktabim” loyihasi doirasida shakllangan. Mamadiyev bog‘chalarga kompyuter va boshqa texnik jihozlar yetkazib berish bo‘yicha o‘tkazilgan tenderlarda tadbirkorlarga “yordam berish” evaziga tizimli ravishda pul talab qilib kelgan.
Mansabdorlar jami 111 200 AQSH dollari hamda 567 mln so‘mni pora tariqasida olayotgan vaqtda huquqni muhofaza qilish organlari tomonidan ashyoviy dalillar bilan ushlangan.
Jinoyat ishida Termiz shahri Maktabgacha va maktab taʼlimi bo‘limi sobiq boshlig‘i Sirojiddin Ro‘ziqulov ham ishtirok etgan. Qiziq jihati, Ro‘ziqulov 2025 yil oktyabr oyida o‘z lavozimidan tantanali ravishda, sovg‘a-salomlar bilan kuzatilgan edi.
Hozirda ikkala mansabdorga nisbatan O‘zbekiston Respublikasi Jinoyat kodeksining 210-moddasi 2-qismi (Pora olish) bo‘yicha jinoyat ishi qo‘zg‘atilgan. Ushbu moddaning tegishli bandlari (takroran, juda ko‘p miqdorda va bir guruh shaxslar tomonidan sodir etilgani) og‘ir jazo choralarini nazarda tutadi.
Tergov harakatlari davom etmoqda. Bu voqea taʼlim tizimidagi tender jarayonlari shaffofligi masalasini yana bir bor kun tartibiga chiqardi.
