Toshkentda noqonuniy olib kirilgan 179 ta iPhone musodara qilindi
Ularning umumiy qiymati salkam yarim milliard so‘mni tashkil etadi.
Toshkentda respublikaga noqonuniy yo‘llar bilan olib kirilgan 179 ta iPhone rusumli telefonlar savdosi fosh bo‘ldi. Bu haqida “Toshkent-AERO” ixtisoslashtirilgan bojxona kompleksi xabar bermoqda.
Qayd etilishicha, Kontrabandaga qarshi kurashish shuʼbasi xodimlari tomonidan o‘tkazilgan tezkor tadbir davomida Chilonzor tumanida shubhali harakatlar kuzatuvga olingan.
Tekshiruv jarayonida bojxona rasmiylashtiruvidan o‘tmagan, noqonuniy yo‘llar bilan respublikaga olib kirilgan 102 dona iPhone qurilmalari “shartli xaridor”ga sotilayotgan vaqtida to‘xtatib qolingan. Ashyoviy dalillarning umumiy qiymati 255 mln so‘mni tashkil etgan.
Shayxontohur tumani yaqinidagi savdo majmuasi atrofida ham xuddi shunday holat yuz bergan. 207 mln 900 ming so‘mlik 77 dona telefon yana yashirin qo‘llardan “shartli xaridor”ga o‘tkazilayotganda tezkor xodimlar tomonidan noqonuniy savdo zanjiri uzilgan.
Hozirda yuqoridagi holatlar yuzasidan bojxona organlari tomonidan surishtiruv harakatlari olib borilmoqda.
Eslatib o‘tamiz, joriy yil boshidan buyon kompleks bojxonachilari tomonidan 35 ta holatda jami 1 mlrd 727 mln so‘mlik 377 dona uyali aloqa vositalarining noqonuniy aylanmasi oldi olingan.
