Toshkentda taqiqda turgan yerni 9 mln dollarga sotmoqchi bo‘lgan ayollar ushlandi
Ular oldindan 200 ming AQSH dollari olgan vaqtlarida qo‘lga tushgan.
Toshkentda yer maydonini 9 mln AQSH dollariga sotmoqchi bo‘lganlarning noqonuniy harakati fosh etildi. Bu haqida DXX matbuot xizmati Zamon.uz‘ga maʼlum qildi.
Qayd etilishicha, muqaddam bir necha marotaba sudlangan ayol o‘zining tanishi bilan til biriktirib, Yunusobod tumanidagi tadbirkorlik subyektiga tegishli bo‘lgan, lekin, hozirda taqiqda turgan 2 gektar noturar yer maydonini xaridorga 9 mln AQSH dollariga sotishga kelishgan.
Ular mansabdor tanishlari orqali barcha hujjatlarni tayyorlab, turar joy toifasiga o‘tkazib berish evaziga oldindan 200 ming AQSH dollari olgan vaqtlarida Davlat xavfsizlik xizmatining Toshkent shahar bo‘yicha boshqarmasi hamda Iqtisodiy jinoyatlarga qarshi kurashish departamenti xodimlari tomonidan ashyoviy dalillar bilan ushlangan.
Hozirda ushbu shaxslarga nisbatan Jinoyat Kodeksining 168-moddasi 4-qismi “a” bandi va 28,211-moddasi 1-qismi bilan jinoyat ishi qo‘zg‘atilib, tergov harakatlari olib borilmoqda.
