Urushda qatnashib, jarohat olib qaytgan andijonlik yigit 3 yilga qamaldi

Jinoyat ishlari bo‘yicha Andijon viloyati Bo‘ston tumani sudida urushga yollanish bo‘yicha ayblangan 23 yoshli yigitga nisbatan jinoyat ishi ko‘rib chiqildi.

 

Ish hujjatlariga ko‘ra, sudlanuvchi 2025 yil yanvar oyida ishlash uchun Rossiyaga borgan. U hujjatlarni rasmiylashtirish uchun murojaat qilganida, unga deportatsiya qilinishi va Rossiya Federatsiyasi hududini tark etishi kerakligi aytilgan. Biroq pul zarurati tufayli u ishlashda davom etgan.

 

Keyinchalik u ishlash uchun Domodedovo shahriga yo‘l olgan, Istra shahrida uni huquq-tartibot idoralari xodimlari to‘xtatib, hujjatlari yo‘qligi sababli politsiya bo‘limiga olib ketishgan.

 

Sudlanuvchining so‘zlariga ko‘ra, uni qandaydir hujjatga imzo qo‘yishga majbur qilishgan, shundan so‘ng uni Varojnik posyolkasiga olib ketishgan. U yerda unga harbiy kiyim, telefon va bank kartalari berilgan va harbiy tayyorgarlik o‘tkazilgan.

 

Keyin boshqa odamlar bilan birga Lugansk shahriga olib ketilgan. 8 may kuni ularga dron yordamida zarba berilgan. U yashirinishga uringan, biroq drondan tashlangan bomba portlashi natijasida oyog‘idan jarohat olgan. Shundan so‘ng u Lugansk kasalxonasiga yuborilgan. Keyinchalik u Moskvaga borib, O‘zbekistonga chipta sotib olgan va uyiga qaytgan.

 

U qilmishidan pushaymonligini bildirib, unga ozodlikdan mahrum qilish bilan bog‘liq bo‘lmagan jazo tayinlashni so‘ragan.

 

Sud fuqaro o.X.ni JKning 154-moddasi 1-qismida (yollanish) nazarda tutilgan jinoyatni sodir etganlikda aybdor deb topdi. Unga 3 yil muddatga ozodlikdan mahrum qilish jazosi tayinlandi.