Farg‘onada bolalar zaharlanishi ortidan jinoiy ish ochildi
Hozirda tegishli turdagi ekspertizalar tayinlanib, dastlabki tergov harakatlari olib borilmoqda.
Avvalroq Farg‘ona viloyatining Farg‘ona shahridagi bir nechta bog‘chalarda bolalar ovqatdan zaharlanib, shifoxonaga yotqizilgani xabar qilingandi.
Ayni paytda holat yuzasidan jinoyat ishi qo‘zg‘atilgan. Bu haqida viloyat IIB axborot xizmati xabar qildi.
Qayd etilishicha, 21 fevral kuni Farg‘ona shahar IIB navbatchilik qismiga kelib tushgan xabarga ko‘ra, shahardagi 58, 2 va 61-sonli Davlat maktabgacha taʼlim tashkiloti tarbiyalanuvchilari “tana harorati ko‘tarilishi, qorinda og‘riq, ich o‘tishi” belgilari bilan Yuqumli kasalliklar shifoxonasiga murojaat qilishgan.
Hozirda vaziyat Farg‘ona viloyati prokuraturasi, IIB hamda boshqa mutasaddi idoralarning masʼullari tomonidan to‘liq o‘rganilmoqda.
Holat yuzasidan Farg‘ona shahar IIB tomonidan O‘zbekiston Respublikasi JKning 257¹-moddasi bilan jinoyat ishi qo‘zg‘atilib, barcha tegishli turdagi ekspertizalar tayinlangan holda dastlabki tergov harakatlari olib borilmoqda.
