Nyu-Yorkda so‘nggi 9 yilda kuzatilmagan qor bo‘roni qayd etildi
Qor qalinligi 55 santimetrdan oshgan. Shaharda favqulodda holat eʼlon qilingan.
Shimoli-sharqiy Amerikaga yopirilgan qor bo‘roni Nyu-York shahrini falaj holga keltirib qo‘ydi. Bir qancha hududlarda qor qalinligi 55 santimetrga yaqin yoki oshib ketgani qayd etildi, bu shaharda so‘nggi to‘qqiz yil ichida kuzatilgan eng yuqori ko‘rsatkich.
Shahar meri Zoxran Mamdani favqulodda holat eʼlon qilib, 22 fevraldan boshlab jamoat transporti va shaxsiy avtomobillar harakati deyarli to‘xtatilganligini maʼlum qildi. Maktablar yopildi, darslar bekor qilindi va aholiga uyda qolish tavsiya etilmoqda.
Bo‘ron shiddat bilan kuchayib, soatiga 5–8 santimetr qor yog‘ishi kuzatildi. Kuchli shamol tufayli yo‘llarda ko‘rish imkoniyati juda cheklangan.
Noqulay ob-havo sharoiti havo transporti tizimiga jiddiy zarba berdi. Nyu-Yorkning yirik aeroportlarida bir kunning o‘zida 5 000 dan ortiq aviareyslar bekor qilingan.
Meteorologik xizmatlar qor bo‘roni haqida ogohlantirishlarini eʼlon qildi. Ko‘p shtatlarda favqulodda holat eʼlon qilinib, yo‘llarda faqat zarur xizmat transporti uchun ruxsat berildi.
Shuningdek, kuchli shamol va qor natijasida elektr taʼminoti uzilib, yuz minglab odamlar elektrsiz qolgan joylar ham bor.
