O‘zbekistonda soliq qonunbuzarliklari haqida xabar berganlarga 3 mlrd so‘m to‘landi
“Soliq hamkor” tizimi orqali bir oyda 12 mingdan ortiq murojaat kelib tushgan.
Joriy yilning yanvar oyida Soliq qo‘mitasi tomonidan fuqarolarga “Soliq hamkor” tizimi orqali soliq qonunbuzarliklari haqida xabar berganliklari uchun jami 3 milliard so‘m miqdorida rag‘bat puli to‘lab berildi.
Hisobot davrida tizim orqali 12 486 ta murojaat kelib tushgan. Ushbu murojaatlar asosida o‘tkazilgan tekshiruvlar natijasida 99 foiz holatda qonunbuzarliklar tasdiqlangan.
Shikoyatlarning asosiy qismi naqd pul cheklarini taqdim etishdan bosh tortish bilan bog‘liq bo‘lib, bu yo‘nalishda 10 879 ta murojaat qayd etilgan. Shuningdek, 510 ta holatda bank kartasi orqali to‘lovni qabul qilmaslik, 34 ta holatda esa naqd pulsiz to‘lovlar uchun asossiz ravishda oshirilgan narxlar yuzasidan murojaatlar kelib tushgan.
Mazkur maʼlumotlar asosida soliq organlari tomonidan 5 mingdan ortiq joyda tekshiruvlar o‘tkazilgan va 4 782 nafar xabar beruvchiga undirilgan jarimalarning 20 foizi miqdorida rag‘batlantirish mablag‘lari ajratilgan.
