Rossiyada o‘zbekistonlik migrantlar o‘rdakcha yurishga majburlandi

Rossiyaning Volgograd viloyatida o‘tkazilgan reyd davomida 34 nafar O‘zbekiston fuqarosi Rossiya hududida noqonuniy yashab kelgani aniqlandi. Mahalliy fuqaro ularga ko‘maklashgani maʼlum bo‘ldi.

 

Maʼlumotlarga ko‘ra, Volgograd viloyatining Ilovlinskiy tumanida huquq-tartibot idoralari xodimlari issiqxona xo‘jaliklarida migratsiya qonunchiligiga rioya etilishini tekshirish maqsadida reyd o‘tkazgan. Tekshiruv davomida xorijdan kelgan ayrim ishchilar Rossiyada bo‘lish qoidalariga amal qilmagani aniqlangan.

 

Ichki ishlar bosh boshqarmasi eʼlon qilgan suratlarda inson huquqlari buzilib, migrantlarga nisbatan “o‘rdak yurish” amaliyoti qo‘llanganini ko‘rish mumkin.  

 

Ushbu holatga 56 yoshli dehqon-fermer xo‘jaligi rahbari sababchi bo‘lgan. U 34 nafar O‘zbekiston fuqarosini ro‘yxatga qo‘yishda ularga yashash joyi taqdim etilgani haqida maʼlumot bergan. Biroq amalda ular ro‘yxatda ko‘rsatilgan manzilda emas, balki issiqxonalar yaqinida yashab kelgan.

 

Ayni paytda holat yuzasidan tekshiruv ishlari olib borilmoqda. Mahalliy fuqaro sodir etgan qilmishini tan oldi. Unga nisbatan Rossiya Federatsiyasi Jinoyat kodeksining 322.3-moddasi (“Chet el fuqarosini Rossiya Federatsiyasida turar joy bo‘yicha soxta ro‘yxatga qo‘yish”) bilan jinoyat ishi qo‘zg‘atildi. Endilikda fermer 5 yilgacha ozodlikdan mahrum etilishi mumkin.