Xalqaro standartlar asosida muhandislar tayyorlayotgan Samarqand xalqaro texnologiya universiteti 4 yilligini nishonladi
Universitetda AQSh, Polsha, Italiya, Hindiston, Janubiy Koreya va Janubiy Afrikadan kelgan professor-o‘qituvchilar talabalarga xalqaro standartlar asosida ta’lim bermoqda.
Xalqaro standartlar asosida muhandis kadrlar tayyorlashni maqsad qilgan oliygohda dunyoning turli davlatlaridan kelgan xorijiy professor- o‘qituvchilar faoliyat olib boradi. Universitet o‘quv reja va dasturlarining qariyb 99 foizi xorijiy texnika universitetlari bilan hamkorlikda, jahon standartlari asosida ishlab chiqilgan.
Bugun bu yerda AQSH, Polsha, Italiya, Hindiston, Janubiy Koreya va Janubiy Afrikadan kelgan mutaxassislar talabalarga taʼlim bermoqda.
Azim kentdagi ilk xususiy oliy taʼlim muassasasi Samarqand xalqaro texnologiya universiteti tashkil etilganiga to‘rt yil to‘ldi.
Bu davrda universitet mustahkam poydevor yaratib, aniq strategik maqsadlarni belgilab oldi.
Taʼlim jarayoni amaliyotga yo‘naltirilgan va dual taʼlim tizimi asosida tashkil etilgan. Natijada talabalar xalqaro forumlar, konferensiyalar va xakatonlarda munosib yutuqlarga erishmoqda.
Universitet o‘zining 4 yilligini tantanali ravishda nishonladi.
Tadbirda xalqaro ilmiy va taʼlim tashkilotlari vakillari, ommaviy axborot vositalari, xorijiy hamkorlar, universitet jamoasi, talabalar hamda ularning ota-onalari ishtirok etdi.
Tantanali tadbir avvalida universitet homiylar kengashi raisi, Kompaniyalar guruhi Bosh direktori Baxtiyor Fazilovning tabrigi o‘qib eshittirildi.
Universitet rektori, professor Yusuf Abdullayev o‘z so‘zida universitetning shakllanish bosqichlariga alohida to‘xtalib, erishilgan yutuqlarini tilga olib kelgusidagi rivojlanishning strategik yo‘nalishlari haqida gapirdi.
Tadbirda eng yuqori natijalarga erishgan bo‘lgan talabalar, universitet professorlari homiylar kengashi raisi tomonidan taqdirlandi. Tantanali tadbir talabalar ijrosida universitet gimni bilan yakunlandi.
