Boshpanasiz hayvonlarni himoya qilish masalasi yuzasidan Toshkent shahar hokimiga senator so‘rovi yuborildi
Unda poytaxtda parvarishxonalar infratuzilmasining yetarli emasligi, ajratilayotgan mablag‘lar, masʼul idoralar hamkorligi va NNTlar tashabbuslarini qo‘llab-quvvatlash bo‘yicha amalga oshirilayotgan ishlar hamda kelgusi rejalar yuzasidan asoslantirilgan maʼlumot taqdim etish so‘ralgan.
Toshkent shahrida boshpanasiz hayvonlarni muhofaza qilish, saqlash va parvarishlash masalalari yuzasidan Senatning Agrar, suv xo‘jaligi va ekologiya qo‘mitasi raisi Anvar To‘ychiyev tomonidan Toshkent shahar hokimi nomiga senatorlik so‘rovi yuborildi.
Qayd etilishicha, so‘nggi yillarda poytaxtda qarovsiz jonivorlarni himoya qilish, ularni saqlash va parvarishlash masalasi dolzarb ahamiyat kasb etib bormoqda. Fuqarolik jamiyati institutlari, ko‘ngillilar hamda hayvonsevar faollar tomonidan o‘z mablag‘lari va tashabbuslari asosida boshpanalar tashkil etilib, jonivorlarni parvarishlash, emlash va davolash ishlari olib borilmoqda.
Shu bilan birga, o‘tkazilgan tahlillar Toshkent shahrida qarovsiz hayvonlarni saqlash va parvarishlash uchun mavjud infratuzilma yetarli emasligini ko‘rsatmoqda. Xususan, mavjud parvarishxonalar soni va ularning sig‘imi ehtiyojni to‘liq qoplamayotgani, ayrim holatlarda shahar va tuman obodonlashtirish boshqarmalari tomonidan qarovsiz hayvonlarni ovlash, saqlash hamda nobud bo‘lgan hayvonlarni utilizatsiya qilish jarayonlarini tashkil etishda kamchiliklar kuzatilayotgani taʼkidlangan.
Bundan tashqari, ayrim fuqarolar tomonidan hayvonlarga nisbatan shafqatsiz munosabatda bo‘lish holatlari qayd etilayotgani jamoatchilikning haqli eʼtirozlariga sabab bo‘layotgani ham alohida qayd etilgan.
Mazkur holatlarni inobatga olgan holda, senatorlik so‘rovida Toshkent shahrida qarovsiz hayvonlarni saqlash va parvarishlashga mo‘ljallangan pitomniklar tashkil etish bilan bog‘liq muammolar, mavjud parvarishxonalar soni va sig‘imi, ushbu sohaga ajratilayotgan mablag‘lar, masʼul idoralar o‘rtasidagi hamkorlik darajasi, shuningdek, nodavlat notijorat tashkilotlari va faollar tashabbuslarini qo‘llab-quvvatlash borasida amalga oshirilayotgan ishlar hamda kelgusidagi rejalar yuzasidan asoslantirilgan maʼlumot taqdim etish so‘ralgan.
