Buxoroda soxta ehson videolari orqali 161 mln so‘m o‘zlashtirgan shaxs qo‘lga olindi
U ijtimoiy tarmoqlarda bemor bolalar nomidan joylashtirilgan xayriya videolarini montaj qilib, bank karta raqamlarini o‘zgartirish orqali fuqarolar yuborgan pullarni o‘zlashtirib kelgan.
Toshkent viloyati IIBB Ramazon oyi munosabati bilan fuqarolarni yangi turdagi kiberfiribgarlik holatlaridan ogoh bo‘lishga chaqirdi. Viloyat IIBBning Axborot texnologiyalari sohasidagi jinoyatlarga qarshi kurashish boshqarmasi tomonidan o‘tkazilgan monitoring hamda fuqarolar murojaatlari asosida olib borilgan tezkor-qidiruv tadbirlari natijasida navbatdagi kiberjinoyat fosh etildi.
Aniqlanishicha, Buxoro viloyatida yashovchi, 2004-yilda tug‘ilgan shaxs Instagram ijtimoiy tarmog‘ida bemor bolalar nomidan joylashtirilgan xayriya videolarini yuklab olib, ularni qayta montaj qilgan. U asl videolardagi bank karta raqamlarini o‘zgartirib, o‘rniga boshqa karta ma’lumotlarini joylashtirgan va fuqarolar tomonidan yuborilgan mablag‘larni noqonuniy ravishda o‘zlashtirib kelgan.
Dastlabki surishtiruvlarga ko‘ra, mazkur shaxs 2025-yil oktabr oyidan jinoyati fosh etilgunga qadar onasiga tegishli bank kartasiga qariyb 2 mingga yaqin tranzaksiya orqali jami 161 million so‘m miqdorida pul mablag‘larini tushirgan hamda ushbu mablag‘larni shaxsiy ehtiyojlari uchun sarflab yuborgan.
Holat yuzasidan O‘zbekiston Respublikasi Jinoyat kodeksining 168-moddasi 3-qismi “g” bandi bilan jinoyat ishi qo‘zg‘atilgan bo‘lib, hozirda tergov harakatlari olib borilmoqda.
