Kim Chen In 13 yoshli qizini KXDR yadro kuchlari dasturi rahbari etib tayinladi — The Chosun Daily
U strategik qurollar bilan bog‘liq jarayonlarda faol ishtirok etib, generallardan hisobotlar qabul qilmoqda
Shimoliy Koreya yetakchisi Kim Chen In o‘zining 13 yoshli qizi Kim Ju Eni KXDR yadro kuchlari dasturi rahbari etib tayinladi.Bu haqda Janubiy Koreyaning The Chosun Daily nashri hukumat va razvedka manbalariga tayanib ma’lum qildi.
Nashr xabariga ko‘ra, razvedka idoralari Kim Ju E “raketa bo‘linmasining bosh direktori” sifatida tilga olinayotganini qayd etilgan. Manbalarga ko‘ra, u strategik qurollar bilan bog‘liq jarayonlarda faol ishtirok etib, generallardan hisobotlar qabul qilmoqda hamda ayrim buyruqlar bermoqda.
Shuningdek, xabarlarda Kim Ju Ening siyosiy va harbiy tadbirlarda tobora ko‘proq ko‘rinish berayotgani, jumladan, raketa sinovlari va strategik obyektlarga tashriflar davomida otasi bilan birga qatnashayotgani ta’kidlanadi. Razvedka ma’lumotlariga ko‘ra, uning bu jarayonlarga jalb etilishi harbiy tuzilmalar ustidan nazoratni mustahkamlashga qaratilgan bo‘lishi mumkin.
Biroq rasmiy ma’lumotlarga ko‘ra, raketa dasturi bo‘yicha tegishli lavozim amalda boshqa mansabdor shaxs tomonidan egallab turilgani aytiladi. Shu bilan birga, nashr manbalari Kim Ju E amalda strategik masalalarda muhim rol o‘ynayotganini bildirgan.
OAVda qayd etilishicha, Shimoliy Koreyada rahbariyat masalasiga oid muhokamalar fonida Pxenyanda muhim siyosiy yig‘ilishlar o‘tkazilmoqda. Unda so‘nggi yillarda mamlakatda amalga oshirilgan o‘zgarishlar sarhisob qilinib, keyingi besh yilga mo‘ljallangan ustuvor yo‘nalishlar belgilanishi ko‘zda tutilgan.
Eslatib o‘tilishicha, Kim Ju E ilk bor 2022-yil noyabr oyida qit’alararo ballistik raketa sinovi tadbirida otasi bilan birga omma oldida ko‘ringan. Shundan buyon u davlat va harbiy tadbirlarda muntazam ishtirok etib kelmoqda. Ayrim xalqaro kuzatuvchilar va razvedka manbalari uning kelajakdagi ehtimoliy voris sifatidagi maqomi bosqichma-bosqich mustahkamlanayotganini taxmin qilmoqda.
