Sankt-Peterburgda o‘zbekistonlik qahramonga soddalashtirilgan tartibda Rossiya fuqaroligini berish taklif qilindi
Shunindek, gubernator Aleksandr Beglov 7-qavatdan yiqilgan bolani qutqarib qolgan Xayrullo Ibodullayevga “Qutqaruvdagi jasorat uchun” ko‘krak nishonini topshirdi.
Rossiya Davlat Dumasi deputati Nikolay Novichkov Sankt-Peterburg shahrida bolani halokatdan qutqarib qolgan o‘zbekistonlik Xayrullo Ibadullayevga Rossiya fuqaroligini soddalashtirilgan tartibda berish masalasini ko‘tarishni taklif qildi.
Deputatning taʼkidlashicha, Xayrullo Ibadullayev ko‘rsatgan jasorat alohida eʼtirof va mukofotga loyiq. U bu haqda TASS agentligiga bergan izohida qahramonlik ko‘rsatgan shaxslarga nisbatan rag‘batlantiruvchi mexanizmlar qo‘llanilishi zarurligini qayd etdi.
Eslatib o‘tamiz, joriy yil 22 fevral kuni Sankt-Peterburg shahrida yetti yoshli bola ko‘p qavatli uyining yettinchi qavatidagi derazadan yiqilib tushgan. O‘sha hududda ko‘cha supuruvchi bo‘lib ishlaydigan 36 yoshli Xayrullo Ibadullayev tezkor harakat qilib, yiqilayotgan bolani ushlab qolgan.
Deputat so‘zlariga ko‘ra, bunday jasorat kam uchraydigan hodisa bo‘lib, kamida davlat mukofoti va jamoatchilik hurmatiga munosibdir. Shu munosabat bilan, agar qahramon bunday istak bildirsa, unga fuqarolikni soddalashtirilgan tartibda berish masalasini ko‘rib chiqish mumkinligi taʼkidlangan.
Shuningdek, Margarita Simonyan maʼlumotiga ko‘ra, Ibadullayevga qahramonlik ko‘rsatgan shaxslar uchun beriladigan Tigran Keosayan mukofoti doirasida 1 million rubl pul mukofoti topshirilgan.
Sankt Peterburg gubernatori Aleksandr Beglov O‘zbekiston fuqarosiga “Qutqaruvdagi jasorat uchun” ko‘krak nishonini ham topshirgan.
Shuningdek, O‘zbekiston tomonidan ham ushbu jasorat yuqori baholanib, Prezident Shavkat Mirziyoyev farmoniga muvofiq Xayrullo Ibadullayev “Jasorat” medali bilan taqdirlandi. Xayrullo Ibodullayevga O‘zbekistonga qaytish aviachiptasi sovg‘a qilingan.
Qahramonning o‘zi ommaviy axborot vositalariga bergan intervyusida rus tilini mukammal o‘rganish hamda kelgusida Rossiya fuqaroligiga ariza topshirishni rejalashtirayotganini maʼlum qilgan.
