AQSh Isroilga F-22 qiruvchi samolyotlarini joylashtirmoqda
Dastlab 12 ta samolyot yuborilgan, ammo ulardan biri texnik nosozlik sababli qaytib kelgan.
AQSH Buyuk Britaniyaning Leykenxit aviabazasidan Isroil janubidagi aviabazaga 11 ta F-22 ko‘p maqsadli qiruvchi samolyotlarini yubordi. Avvalgi ma’lumotlarga ko‘ra, dastlab 12 ta samolyot uchgan, ammo ulardan biri texnik nosozlik sababli qaytib kelgan. Bu haqda The Times of Israel xabar berdi.
F-22 samolyotlari avval Buyuk Britaniyaga yetib kelib, bir necha kun qolgan, so‘ngra Isroilga uchgan.
Agentliklar xabariga ko‘ra, AQSh ilgari Yaqin Sharqdagi aviabazalarga o‘nlab F-22 va F-35 qiruvchi-bombardimonchi samolyotlari, shuningdek, F-15 va F-16 qiruvchi samolyotlari hamda o‘nlab tankerlarni joylashtirgan. Shu bilan birga, yuzlab transport reyslari amalga oshirilgan.
Ma’lumotlarga ko‘ra, AQSh Qurolli kuchlari shtab boshliqlari qo‘mitasi raisi general Den Keyn va yuqori lavozimli amaldorlar Eronga qarshi harbiy operatsiyalar xavfi, uzoq davom etish ehtimoli va mojarolarga olib kelishi mumkinligi haqida ogohlantirgan.
AQSh prezidenti Donald Tramp diplomatik yechimni afzal ko'rishini bildirgan, ammo muzokaralar muvaffaqiyatsiz bo'lsa, bir necha bor kuch ishlatish bilan tahdid qilgan. Eron Isroil va Amerika nishonlariga zarbalar bilan javob qaytarishga va'da bergan. AQSh-Eron muzokaralarining keyingi bosqichi shu hafta Jenevada bo'lib o'tishi kutilmoqda.
